شعور، لا شعور اور تحت الشعور

شعور، لا شعور اور تحت الشعور

میرے نزدیک انسانی ذہن کو تین حصوں میں منقسم کیا جاسکتا ہے. شعور، لا شعور اور تحت الشعور. یہ تینوں کڑیاں
انسان کی یادداشت سے مربوط انداز میں جڑی ہوتی ہیں. انسان کچھ جبلتیں، کچھ خصلتیں اور کچھ خصوصیات ماں کے پیٹ سے لے کر پیدا ہوتا ہے. جیسے رونا، تکلیف محسوس کرنا، ڈرنا، نیکی اور بدی کا بنیادی تصور رکھنا وغیرہ. یہ تمام معلومات وہ مشاہدے کے ذریعے سے حاصل نہیں کرتا بلکے یہ اس کی فطرت میں خدا کی جانب سے ودیعت شدہ ہوتی ہیں. اسی سے انسان کا فطری شاکلہ وجود پذیر ہوتا ہے اور ذہن کے جس حصے میں ان کا الہامی اندراج ہے، وہ حصہ تحت الشعور کے نام سے موسوم کیا جاتا ہے

 سورہ شمس میں ' فالھما ھا فجورھا واتقواھا ' اسی کی تفسیر ہے. ذہن کا دوسرا اور سب سے اہم حصہ لاشعور ہے، یہاں انسان کا کل علم جو اسے کسی بھی مشاہدے یا حادثے کے نتیجے میں حاصل ہوا ہوتا ہے، پنہاں رہتا ہے. ایسا بھی ہوتا ہے کہ کسی واقعہ کا وقوع اور ماخذ تو ذہن سے مٹ جاتا ہے لیکن اپنی اثر انگیزی کی وجہ سے اسکا احساس راسخ رہتا ہے. قران کی اصطلاح میں نفس امارہ اور نفس لوامہ کی کشمکش اسی حصے میں برپا رہتی ہے. جیسے بچپن کا کوئی حادثہ، موسیقی، گزرتی عمر کے اچھے برے واقعات وغیرہ. ذہن کا تیسرا اور فعال حصہ شعور کہلاتا ہے، جو اپنا تعلق صرف حال سے قائم رکھتا ہے. اسکا کام یہ ہے کہ جو حالات اور واقعات اسکے سامنے وقوع پذیر ہوں، یہ انکا جائزہ لے کر اسی سے متعلق معلومات لاشعور یا تحت الشعور سے اخذ کرکے جاری کردے. یہ معلومات اکثر تو شعوری کاوش کا نتیجہ ہوتی ہیں مگر بعض صورتوں میں انکا اخراج لاشعوری طور پر سرزد ہوتا ہے. شعور کے سامنے جو بھی حالات وارد ہوتے ہیں، یہ انکا تقابلی جائزہ اپنی پچھلی معلومات سے کرتا ہے، پھر جو نتیجہ نکلتا ہے اسے بھی لاشعور سے منسلک کردیتا ہے. یوں یہ سلسلہ چلتا رہتا ہے اور انسانی شخصیت تکمیل پاتی ہے. 

====عظیم نامہ====